مش هطول في المقدمة, ولكن الاعتذار واجب لتأخري في رفع القضية
بدأت القصة بوقوفنا في الميدان يوم 9-9 بانتظار وصول مسيرة شبرا الحاشدة وسط أحاديث جانبيه هنا وهناك وفجأه ظهر هذا الوجه المصري وسطنا يحمل من المرارة ما لا يدع لك المجال لأن ترفض الاستماع له.
ولأني أؤمن بأن صاحب القضية هو أفضل من يشرحها فلن أطيل عليكم,
هذا ما قاله الفلاح المصري الاصيل "سعد حنفي" رافعاً صوته وصوت قريته من ميدان التحرير للمسؤولين
**ملحوظة: يمكنك مشاهدة الحديث مسجل في اخر الصفحة
*سعد محمود حنفي
مركز كومامبو - البيارة - محافظة أسوان
حدانا أراضي اسمها "ارض زكريا عزمي" والعصابة السابقة ... لا تقل عن (100 ألف فدان)
ليه النظام الحالي موزعهاش على معدومي الدخل وشباب الخرجيين والحريم الارامل؟
ليه الدكتور عصام شرف مسافر للجماعة النوبيين؟ هي أسوان نوبة بس؟ ولا نوبة وصعيد وفيها مسيحيين و..؟
يا دكتور عصام شرف لو وزعت قراط واحد -قسما بالله- .............. (مش واضحه)
المحافظة فيها أراضي كتير تكفي جمهورية مصر العربية, وزع الاراضي بما يرضي الله على شباب الخرجيين
ومحدودي الدخل والحريم الارامل والفقراء والمساكين
مفيش فرق بين بينهم وبين مسيحي وما بين مسلم
*دكتور ستيته: ما بيوزعوش أراضي يا حج؟ غير حكاية النوبة, مابيوزعوش أراضي لشباب الخرجيين؟
*عم سعد: لأ مابيوزعش,
اللي وزع النظام السابق للناس اللي معاها وسايط من المحافظات الاخرى
واحد يجيلي من الشرقية يزرع في أسوان, ده حرام ولا حلال؟؟
المحافظات الاخرى خدت ومحافظة أسوان ماخدتش من أرض النوبة غير 5%
أنا بتكلم ومسؤول عن كل كلمة بقولها
مع العلم أنا رحت للدكتور عصام شرف, قابلني راجل هناك موظف اداني رقم زي ده ووداني للزراعة واستصلاح اراضي
(الصور أوضح في اخر الصفحة)
الراجل بتاع استصلاح الاراضي قال لي "يا عم الحاج, أنا جهه بتستصلح أراضي فقط مش جهه بتوزع الأراضي"
في عدد أسماء هنا لا يقل عن مائة فرد
*كلهم أسوانية؟
*كلهم أسوانية ومن قرية واحدة, دول معدومين الدخل ومنهم شباب خريجين
بقوله "يا دكتور عصام شرف احنا مش عايزين مائه فدان ولا عشر فدادين, احنا عايزين سبعة فدادين وبيت يتكون من أربغ غرف وصالة وحمام ومطبخ
مش عمارة وشقة, يا عم بلاش, احنا هنجيب حصيرة ونفرش بيها
ماتديش واحد مائة فدان وواحد مفيش, ارحمننا الرحمة حلوة"
مع العلم أنا وديت الشكوة بتاعتي لحقوق الانسان, رحتلهم سرايا القبة, والراجل قاللي أنه قدم الشكوة للنائب العام ومعرفش ايه اللي حصل فيها
احنا عايزين أرض يا اخوانا
عايزين ناكل من خيرنا, من عرق جبيننا
ماينفعش أكون أنا راجل فلاح وراجل مزارع ومايكونش عندي أرض
لم أكن أنتوي أن أعمل مدونة بصراحة رغم كل اللي حصل في البلد, الكتابة مش لعبتي ولا مجالي رغم أني بحب أكتب من زمان على ورق لنفسي وممكن أقطعه في الاخر بس اللي حصل امبارح دي أمانة بوصلها مش أكتر.
أنا هنا مش هأكتب رأي شخصي, أنا هنقل كلام بالحرف حصل عشان أنا أتطلب مني أنقله ... هأحكي الحكاية ومش هأطول عليكم لأن الموضوع لوحده طويل.
امبارح قررت أني -والعياذ بالله- اذاكر وابدأ معركتي مع المواد فقلت افتح تويتر أشوف الأخبار الأول وكانت الأخبار عبارة عن كلمات متقطعة كالأتي (ماسبيرو - تجار فراخ - أهالي مخيمات السلام - أمن وجيش وداخلية - أهالي الشهداء - الجو حر ....) ومقدرتش أجمع الصورة بشكل واضح .
هيلا بيلا يا جدع, البس وانزل قدر الموقف بنفسك من قلب الأحداث,, تاكسي: ماسبيرو ... اتفضلي ... اتفضلت أول ما وصلت وقفت في الجزء اللي قاعد فيه أهالي مخيم السلام, طلعت الكاميرا وصورت مجموعة ستات كانوا قاعدين بين الخيم وفجأة واحدة منهم شاورتلي
*والله أنا بصور بس مش هأذيكي ويا سيدتي لو عايزاني أمسح الصورة هأمسحها
*تعالي هنا, أقعدي جانبي (تخبط بأيدها على بطانية على الارض)
*حاضر, و أدي قاعده
*أنا هأحكيلك الحكاية كلها بس أمانه عليكي تنشريها
*يا سيدتي أنا مش صحفية, ده أنا كبيري ببعت لصحابي على النت
*مش مشكلة, قوللهم عشان يعرفوا
- ودي كانت بداية معرفتي بالسيدة عواطف ذكي
**(ممكن تسمع الحديث مسجل صوتياً في اخر الصفحة)
*حاضر, قوليلي وأنا اللي في ايدي هأعمله
*عواطف زكي:
احنا بقلنا دلوقتي 6 أشهر في الشوارع, قاعدين في الشوارع
عصام شرف بيضحك علينا, نروح للمحافظ يضحك علينا .. معانا أطفال ماتوا ومعانا واحده لسه ميته أول امبارح
نروح كل شوية بورق يقولوا الشهر الجي, طب الشهر اللي وراه, طب بكرة طب بعده ويضحكوا علينا ..
مفيش اي حاجه, مفيش اي حاجه خالص
واحنا قاعدين زي ما أنتو شايفنا كده, احنا لو عندنا شقق هنقعد القعده دي؟ بيقولوا احنا عندنا, احنا عندنا فين؟
قعدونا في شقق وتعالوا اعملوا علينا بحث ولو لقيتوا عندنا شقق اللي عنده شقه يحبسوه .. كلهم غلابه هنا, كل ده غلابه
والرجاله قعدين من اشغالهم وعيالنا بيموتوا وعيالنا عيانيين
*طيب قوليلي أشغالهم بتبقى ايه تقريبا؟؟
اشغالهم طايفة,, يوم كده ويوم كده, غلابة
-لا أخفي عنكم أن أعداد كبيرة تجمعت, منهم من يتابع ما يحدث ومنهم من يريد ان يدلوا بدلوه ولكن أبو حبيبة لم يترك المجال لأحد فبدء بالكلام (وبين حيرتي من لغتة الفصحى الركيكة وبين اسئلته التي لم أجد لها أجابة) حاولت أن أسجل ما يلي:
*اتفضل
*أبو حبيب:
احنا هنا العدد الأجمالي المعترف به من المحافظة والاسكان ذات نفسه, احنا 1333 اسره ومعانا كشوفات ومعانا ما يثبت ذلك ومعانا ما يقول اننا صحاب حق ونحتاج للأربع حيطان ... ليه ماينفذوش؟
ليه اللي قعد على الكرسي وبقى محافظ ولا وزير ولا رئيس جمهورية, بدل ما هما بيبصوا لتشكيل رئاسة ما يبصوا للناس وأنها تتلم في أربع حيطان من باب أولى, لكن مايرموناش في الشارع بعيالنا ويفكروا في حاجة اسمها رئاسة جديدة رئاسة جديدة ايه وهي البلد نايمه في الشارع؟
هل البلد دي قابله على شعبها تبقى عرضه -سواء ليهم أو لبعض الناس من بره بيجوا يتمشوا على الكورنيش (الاجانب)- ليه هما بيعملونا عبرة مصر واحنا شعب مصر ويطلعونا على النت؟
هل هما مابيتكسفوش واحنا طالعين على جميع أو بعض الدول ان احنا شباب مصر وشعب مصر يصبح عار؟
هما كده اللي بيطلعونا عار الثورة دي عملت نظافة, نظافة, معنى كلمة نظافة يعني يبقى فيه "عدالة" وعملية رحمة بالبشر.
احنا قاعدين من شغلنا بقالنا 6 أشهر بدون عمل, مين بيدينا واحنا بنبيع عفش بيتنا ومش عارفين نأكل عيالنا؟
رحنا عند السيد عصام شرف قعدنا هناك معتصمين ونزل بعد ما قسم اليمين بيومين وعدنا أنه هيدينا شقق وهيلتزم بمطالبنا
فأخدنا بعضنا وجبلنا أربع أتوبيسات, كان علشان المشايخ نزلوا وقالوا موضوع كاميليا ده (كاميليا شحاتة) ده نفس اليوم, أنا بقولك على يوم احنا مش هننساه
الناس المتضررة في الشارع مابتنساش اليوم اللي بيعدي عليها
رحنا الخيم اللي هما عملوها لنا, نزلولنا تأمين جيش وشرطة ... والشرطة أغتصبت عيل (القضية دي بتوضيح أكثر في البوست القادم) .. حصل ضرب نار ودخل علينا بلطجية, الجيش طبق علينا, الشرطه بسبب وقعتها دي -اللي هيه كارثة أن الشرطة تضحك على بني ادم- أنتو مش بتأمنوا بقى, أنتو بتغتصبوا
رفعوا تأمين الشرطة من علينا وبقت خرابة, دخل علينا بلطجية كانوا بيضربوا نار في الخيم
ومفيش نتيجة مع أي مسؤول يرحمنا, في الأخر جينا هنا "ماسبيرو" ورحنا عند المحافظة, اتهنا والجيش اعتدى علينا وأصبحنا احنا أقل شعب متداس عليه هو الشعب المصري هي الثورة دي اتعملت عشان ترفع من شأن الشعب المصري ولا تخسف به الأرض؟
تعملت عشان الناس اللي معاها عيال دي يبقوا بين أربع حيطان, ولا يصبحوا عار على الدولة؟
اللي هما بيعملوا ده عشان مفيش مسؤول زي المجلس الأعلى العسكري, المفروض المستشار يقرص على د.عصام شرف, ما هو في أعلى منه!!ا
ما هو الرئيس الحالي هو السيد المشير, اللي ماسك رئيس حالي لمدة ستة أشهر أو بعد 6 أشهر لحد ما تتشكل رئاسه طيب ما أنت قبل ما تفكر تشكلي رئاسة, شيل شعبك ده من على الأرض بأطفاله, بدل ما بييجي أوروبيين وبعض دول بتصور وبتنزلك على النت وغير النت
هما مابتكسفوش على بلدهم أن الحريم بتاعت البلد نايمه كده؟
ولا رجالة البلد -اللي بره بيقولوا عليهم رجالة مصر- قاعدين بدون عمل؟
أقولك ايه, هنسرق؟ نوقفلهم العربيات في الشارع؟؟ ما هي دي أخرتها
احنا بعنا عفش بيتنا والبلطجية قاعدين دلوقتي في شقق والجيش مكنها من القعاد
ليه مايمكناش احنا صحاب الحق وبعدها يفحصونا؟
احنا مش معترفين بأي مسؤول يثبتنا ويودينا مخيمات
احنا من ماسبيرو يطلعنا على شقق فاضية من ال11 ألف وحده سكنية والمحافظة عندها ما يثبت الوحدات السكنية الفاضية دي, يطلعونا (يسكنونا) ويعملوا علينا بحث يا أما يدونا عقودنا واحنا نروح معاهم حباً في الخيم بس يضحكوا علينا ويقولولنا أمشوا من قدام ماسبيرو؟ احنا مش هانمشي غير على الكفن أو على أربع حيطان عشان أحنا مش هنتمرمط أكتر من كده ....
تسجيل صوتي للسيدة عواطف ذكي وأبو حبيبة وأسباب اعتصامهم في ماسبيرو
السيدة عواطف ذكي مع ابنتها .... وايصال استلام وحدة سكنية للحالات القاسية
بس عواطف لسه قاعده في الشارع عشان ماستلمتش حقها المشروع!!!
ولأني أؤمن بأن صاحب القضية هو أفضل من يشرحها فلن أطيل عليكم,
