لم أكن أنتوي أن أعمل مدونة بصراحة رغم كل اللي حصل في البلد, الكتابة مش لعبتي ولا مجالي رغم أني بحب أكتب من زمان على ورق لنفسي وممكن أقطعه في الاخر بس اللي حصل امبارح دي أمانة بوصلها مش أكتر.
أنا هنا مش هأكتب رأي شخصي, أنا هنقل كلام بالحرف حصل عشان أنا أتطلب مني أنقله ... هأحكي الحكاية ومش هأطول عليكم لأن الموضوع لوحده طويل.
امبارح قررت أني -والعياذ بالله- اذاكر وابدأ معركتي مع المواد فقلت افتح تويتر أشوف الأخبار الأول وكانت الأخبار عبارة عن كلمات متقطعة كالأتي (ماسبيرو - تجار فراخ - أهالي مخيمات السلام - أمن وجيش وداخلية - أهالي الشهداء - الجو حر ....) ومقدرتش أجمع الصورة بشكل واضح .
هيلا بيلا يا جدع, البس وانزل قدر الموقف بنفسك من قلب الأحداث,, تاكسي: ماسبيرو ... اتفضلي ... اتفضلت
أول ما وصلت وقفت في الجزء اللي قاعد فيه أهالي مخيم السلام, طلعت الكاميرا وصورت مجموعة ستات كانوا قاعدين بين الخيم وفجأة واحدة منهم شاورتلي*والله أنا بصور بس مش هأذيكي ويا سيدتي لو عايزاني أمسح الصورة هأمسحها
*تعالي هنا, أقعدي جانبي (تخبط بأيدها على بطانية على الارض)
*حاضر, و أدي قاعده
*أنا هأحكيلك الحكاية كلها بس أمانه عليكي تنشريها
*يا سيدتي أنا مش صحفية, ده أنا كبيري ببعت لصحابي على النت
*مش مشكلة, قوللهم عشان يعرفوا
- ودي كانت بداية معرفتي بالسيدة عواطف ذكي
**(ممكن تسمع الحديث مسجل صوتياً في اخر الصفحة)
*حاضر, قوليلي وأنا اللي في ايدي هأعمله
*عواطف زكي:
احنا بقلنا دلوقتي 6 أشهر في الشوارع, قاعدين في الشوارع
عصام شرف بيضحك علينا, نروح للمحافظ يضحك علينا .. معانا أطفال ماتوا ومعانا واحده لسه ميته أول امبارح
نروح كل شوية بورق يقولوا الشهر الجي, طب الشهر اللي وراه, طب بكرة طب بعده ويضحكوا علينا ..
مفيش اي حاجه, مفيش اي حاجه خالص
واحنا قاعدين زي ما أنتو شايفنا كده, احنا لو عندنا شقق هنقعد القعده دي؟ بيقولوا احنا عندنا, احنا عندنا فين؟
قعدونا في شقق وتعالوا اعملوا علينا بحث ولو لقيتوا عندنا شقق اللي عنده شقه يحبسوه .. كلهم غلابه هنا, كل ده غلابه
والرجاله قعدين من اشغالهم وعيالنا بيموتوا وعيالنا عيانيين
*طيب قوليلي أشغالهم بتبقى ايه تقريبا؟؟
اشغالهم طايفة,, يوم كده ويوم كده, غلابة
-لا أخفي عنكم أن أعداد كبيرة تجمعت, منهم من يتابع ما يحدث ومنهم من يريد ان يدلوا بدلوه ولكن أبو حبيبة لم يترك المجال لأحد فبدء بالكلام (وبين حيرتي من لغتة الفصحى الركيكة وبين اسئلته التي لم أجد لها أجابة) حاولت أن أسجل ما يلي:
*اتفضل
*أبو حبيب:
احنا هنا العدد الأجمالي المعترف به من المحافظة والاسكان ذات نفسه, احنا 1333 اسره ومعانا كشوفات ومعانا ما يثبت ذلك ومعانا ما يقول اننا صحاب حق ونحتاج للأربع حيطان ... ليه ماينفذوش؟
ليه اللي قعد على الكرسي وبقى محافظ ولا وزير ولا رئيس جمهورية, بدل ما هما بيبصوا لتشكيل رئاسة ما يبصوا للناس وأنها تتلم في أربع حيطان من باب أولى, لكن مايرموناش في الشارع بعيالنا ويفكروا في حاجة اسمها رئاسة جديدة
رئاسة جديدة ايه وهي البلد نايمه في الشارع؟
هل البلد دي قابله على شعبها تبقى عرضه -سواء ليهم أو لبعض الناس من بره بيجوا يتمشوا على الكورنيش (الاجانب)- ليه هما بيعملونا عبرة مصر واحنا شعب مصر ويطلعونا على النت؟
هل هما مابيتكسفوش واحنا طالعين على جميع أو بعض الدول ان احنا شباب مصر وشعب مصر يصبح عار؟
هما كده اللي بيطلعونا عار
الثورة دي عملت نظافة, نظافة, معنى كلمة نظافة يعني يبقى فيه "عدالة" وعملية رحمة بالبشر.
احنا قاعدين من شغلنا بقالنا 6 أشهر بدون عمل, مين بيدينا واحنا بنبيع عفش بيتنا ومش عارفين نأكل عيالنا؟
رحنا عند السيد عصام شرف قعدنا هناك معتصمين ونزل بعد ما قسم اليمين بيومين وعدنا أنه هيدينا شقق وهيلتزم بمطالبنا
فأخدنا بعضنا وجبلنا أربع أتوبيسات, كان علشان المشايخ نزلوا وقالوا موضوع كاميليا ده (كاميليا شحاتة) ده نفس اليوم, أنا بقولك على يوم احنا مش هننساه
الناس المتضررة في الشارع مابتنساش اليوم اللي بيعدي عليها
رحنا الخيم اللي هما عملوها لنا, نزلولنا تأمين جيش وشرطة ... والشرطة أغتصبت عيل (القضية دي بتوضيح أكثر في البوست القادم) .. حصل ضرب نار ودخل علينا بلطجية, الجيش طبق علينا, الشرطه بسبب وقعتها دي -اللي هيه كارثة أن الشرطة تضحك على بني ادم-
أنتو مش بتأمنوا بقى, أنتو بتغتصبوا
رفعوا تأمين الشرطة من علينا وبقت خرابة, دخل علينا بلطجية كانوا بيضربوا نار في الخيم
ومفيش نتيجة مع أي مسؤول يرحمنا, في الأخر جينا هنا "ماسبيرو" ورحنا عند المحافظة, اتهنا والجيش اعتدى علينا وأصبحنا احنا أقل شعب متداس عليه هو الشعب المصري
هي الثورة دي اتعملت عشان ترفع من شأن الشعب المصري ولا تخسف به الأرض؟
تعملت عشان الناس اللي معاها عيال دي يبقوا بين أربع حيطان, ولا يصبحوا عار على الدولة؟
اللي هما بيعملوا ده عشان مفيش مسؤول زي المجلس الأعلى العسكري, المفروض المستشار يقرص على د.عصام شرف, ما هو في أعلى منه!!ا
ما هو الرئيس الحالي هو السيد المشير, اللي ماسك رئيس حالي لمدة ستة أشهر أو بعد 6 أشهر لحد ما تتشكل رئاسه
طيب ما أنت قبل ما تفكر تشكلي رئاسة, شيل شعبك ده من على الأرض بأطفاله, بدل ما بييجي أوروبيين وبعض دول بتصور وبتنزلك على النت وغير النت
هما مابتكسفوش على بلدهم أن الحريم بتاعت البلد نايمه كده؟
ولا رجالة البلد -اللي بره بيقولوا عليهم رجالة مصر- قاعدين بدون عمل؟
أقولك ايه, هنسرق؟ نوقفلهم العربيات في الشارع؟؟ ما هي دي أخرتها
احنا بعنا عفش بيتنا والبلطجية قاعدين دلوقتي في شقق والجيش مكنها من القعاد
ليه مايمكناش احنا صحاب الحق وبعدها يفحصونا؟
احنا مش معترفين بأي مسؤول يثبتنا ويودينا مخيمات
احنا من ماسبيرو يطلعنا على شقق فاضية من ال11 ألف وحده سكنية والمحافظة عندها ما يثبت الوحدات السكنية الفاضية دي, يطلعونا (يسكنونا) ويعملوا علينا بحث يا أما يدونا عقودنا واحنا نروح معاهم حباً في الخيم بس يضحكوا علينا ويقولولنا أمشوا من قدام ماسبيرو؟
احنا مش هانمشي غير على الكفن أو على أربع حيطان عشان أحنا مش هنتمرمط أكتر من كده ....
تسجيل صوتي للسيدة عواطف ذكي وأبو حبيبة وأسباب اعتصامهم في ماسبيرو
السيدة عواطف ذكي مع ابنتها .... وايصال استلام وحدة سكنية للحالات القاسية
بس عواطف لسه قاعده في الشارع عشان ماستلمتش حقها المشروع!!!
أحييكى تغطية هايلة وحية كأنك بتسمع من الأهالى من غير ماتحتاج تسمع التسجيل الصوتى
ردحذفبس ليا ملاحظة على التنسيق احنا تربية يتوتر وفيسبوك وال 140 حرف فياريت تكبرى الخط وتميزى الأجزاء المهمة
كمان تضيفى comment boxو like box عشان التفاعل
هتلاقى الشرح هنا
http://www.bloggerplugins.org/2010/04/facebook-like-button-for-blogger.html
https://developers.facebook.com/docs/reference/plugins/comments/
وأهلا بيكى وبالتوفيق فى بلوجر :)
هو ده التدوين اللي على حق يا أميرة، شكرا انك وصلتي لي صوت الناس بنفسهم وبصدقهم ... اللي ما يتعاطفش مع معاناة الناس دي يبقى ابن ستين كلب معندوش دم
ردحذفالثورة قامت عشان الكرامة والعدالة وده وضع لا فيه كرامة ولا عدالة ولا رحمة
الله يحرق ابوهم الأوساخ اللي شردوا الناس وبهدلوهم كدة
طول عمرهم بيعاملوا الناس دى باستحقار شديد ، ما انتوا طول عمركوا عايشين فى عشش وعشوائيات ايه المشكلة لما تقعدوا فى خيم كامم شهر ولا سنة على ما نبقى نشوف لكم شقق ، اللى اختلف ان الناس كانت متوقعة تغيير بعد الثورة ، لكن للأسف ..
ردحذفبوست رائع يا اميرة، وفعلا تغطية دقيقة ومن قلب الاحداث، بجد سلم ايدك. انا فعلا كان نفسى انزل واسمع الكلام من الناس اللى هناك رأسا.
ردحذفانتى كده سمعتى الناس صوتهم هناك من غير ماينزلوا. برافو عليكى بجد.
ومبروك المدونة يا اميرة :)
لخصتي كل اللي بيحصل وصباح العياط والاحساس بالعجز :(
ردحذفابداع من اول مره مدونه من قلب الحدث استمري مشروع مدونه ناجحه بجد نقلتي صورة الحدث بوضوح
ردحذفوالف ميروك علينا المدونه الجديده ( أميره )
oooooobbbbbaaaaaa ya amoz enta ya gamed , mabrouk el blog jina
ردحذفبجد شكرا جدا لتشجعكم, بجد مبسوطه ان البوست عجابكم وأني قدرت أوصل جزء من اللي بيحصل في ماسبيرو...
ردحذفالناس هناك في وضع غير ادمي واللي يشوفهم وهما قاعدين مش هيفهم هما ازاي عايشين اصلا لحد دلوقتي..
هأحاول انزل بقيت الصور والحكايات والفيديو عشان صوتهم يوصل أكتر..
شكراً تاني :)
رائع يا أميرة,,,الكلام صادق جداً
ردحذفتحياتي بجد :)
مقال جميل جداً ويوصل علي طول و اختصار مفيد والله
ردحذفشكراً ليكي